Panatinaikos je u kratkom vremenu ostao bez tri važna igrača. Prvi je nogu povukao Dešon Tomas, zatim Nikos Papas, pa Nik Kalatis.
Kalatis, Amerikanac sa grčkim korijenima i grčkim pasošem odlučio je da pokupi kofere poslije pet uzastopnih, odnosno ukupno osam sezona u Panatinaikosu. Kako grčki i španski mediji uveliko pišu, njegova sljedeća destinacija biće Barselona.
Koji sat prije njega, a posijle sedam godina u zelenom dresu, iz kluba je otišao i Papas. Doduše ne zna se u kom smjeru.
Nekoliko dana ranije i Tomas je odlučio da zatraži raskid ugovora koji je isticao u ljeto 2021. U prvi mah za njega su bili zainteresovani Valensija i Baskonija, a prema pisanju “Eurohoops”, Amerikanac je pred potpisom sa svježim šampionom Španije.
Inače, novi trener PAO, Jorgos Vovoras je potvrdio da je klub postigao dogovor o angažovanju Markusa Fostera koji u Atinu stiže iz Hapoel Holona, kao i da Bil Bentil sigurno ostaje.
V.V.
